قهوة سطوحي .. بقلم احمد خليفة

( 2017 وانا منتظر صديقي محمد الورداني في قهوة سطوحي برمسيس وكانت مفقودة لم يسبق نشرها )

في قهوة سطوحي في وسط الميدان

وقاعد باقلب وشوش الزمان

بالاقي اللي رايح في عرقه وسايح

وقاعد في مطعم بياكل جعان

والاقي اللي واقف يدور وخايف

تفوته مواصلة توديه مكان

والاقي اللي قاعد يفكر يساعد

عجوزة وشايلة مشنة وصوان

والاقي اللي طالعة من الحر والعة

تولع سيجارة تبعزق دُخَان

والاقي اللي راجع يقلب مواجع

ومش لاقي صاحبه يدور كمان

والاقي العساكر تجمع تذاكر

وع القطر ناوية وماشية ف أمان

وانا لسه قاعد عنيه تباعد

بادور يا صاحبي عليك في الميدان

في قهوة سطوحي في وسط الميدان

تعليقات الفيسبوك